Guidúbilu' runebia'ya',

by Víctor Terán

Guidúbilu' runebia'ya',
guidúbinaca peou'.
Pa ñácalu' ti guidxi
ratiicasi ninabadiidxa' cabe náa
naa nulué' pa neza riaana ní.
Riuuládxepea' guidúbilu',
riuuladxe' guuya' guiní'lu', guxídxilu',
guzeque yannilu'. Dxiña yaga guiropa' dani
zuguaa ndí' xtilu', ra guyaa' dxiqué
rigucaa' ruaa bidó'. Ñacaladxe' rua'
ñuá' ne niree ndaani' guixhidó' xtilu',
ni guya' dxiiña' guiluxe guendanabani ndaani'.
Biza'naadxi' bido' guzana lii, qui gápalu'
ra guidiiñeyulu'. Binnindxó' nga naa
ti bibane' lii, guca' lii. Yanna ma cadi naa
ridxiiche' gudxigueta lú ca nguiiu ra zedi'dilu',
ma cadi naa racalugua' cueelu' lari.
Ti bidxiña lubí nga lii, ti balaaga' guie'
ziguite yeche' lu guiigu' ti siadó'. 

Gabati' lii nou' qui ñunebia'ya', nou'
qui ñuuladxe'. Pa ñándasi ñácarua'
biaani' ruxheleruaa ruuya' ca nduni
yuxido' quichi' beelaxa'nalu'. Pa ñándasi
nibeza rua'
                       ndaani' guidxi sicarú
                                                        ni nácalu'.

The literal translation of this poem was made by David Shook

The final translated version of the poem is by David Shook

Comments

No comments have been made on this poem yet! Why don’t you start us off?


© Poetry Translation Centre 2004-2012