Poems

هۆنراوه‌یه‌كی ناته‌واو

هه‌ر به‌ وشه

نیگارێكی ئازیزه‌كه‌ی خۆم كێشاوه‌
سه‌یری ده‌كه‌م:
ده‌ق خۆیه‌تی!
هه‌ر بۆ گوێیه‌ ته‌نكه‌كانی گواره‌ ماوه‌.
‌                *  *  *
فه‌رهه‌نگه‌كان
با به‌خۆیان هه‌ر بنازن،
با بڕسكێن،
با بخه‌مڵێن به‌ هه‌زاران وشه‌ی به‌ده‌و.
به‌چی ده‌چن،
كه‌ په‌یڤێكیان تێدا نه‌بێ،
         بشێ ببێ به‌ گواره‌ی ئه‌و!
       *  *  *
من ئه‌ییووبم.
به‌ ئاسانی پشتی ئومێدم ناچه‌مێ.
وشه‌یه‌كه‌ و عه‌ودالیمه‌،
زوو یا دره‌نگ هه‌ر ده‌یگه‌مێ –
له‌سه‌ر باڵی سیمرخیش بێت،
ئاسمان بست بست ده‌پشكنم.
به‌ زه‌ویدا بچیته‌ خوار،
بنزه‌ویگه‌ڕ هه‌بێ منم.

وشه‌یه‌كه‌ و ده‌دۆزمه‌وه‌،

ئه‌گه‌ر بنپێی خه‌یاڵیشم

            شه‌قشه‌ق و پاره‌پاره‌ بێ.

گه‌ر هه‌ر نه‌بوو،

دایده‌تاشم!

ناهێڵم گوێی ئازیزه‌كه‌م بێ گواره‌ بێ!

 20/12/1999 - یوتوبوری