Máfipáwówó

Ẹ métí bora kẹ́ gbóhun tí mo fẹ́ wí orin ewì ń gbé mi nínú

Ibi mo sọ̀rọ̀ dé ni ngó fàbọ̀ sí

Orin ọgbọ́n ṣẹ́kù nínú mi

Orin olówó lorin tó yó sí mi lẹnu

Kò sí gbàrọgùdù mọ́, orin olówó ló kù nílẹ̀

Mo ní b’ọ́lọ́lá ayé ti lọ́lá tó

Ọlọ́lá ò le sùn kó dijú tán

Owó ni wọ́n tún fi ojojúmọ́ lé pa kiri

Àjáàjo ò sì jẹ́ kí wọ́n rí ìhà méjééjì sùn

Wọn ò ráyè sùn lálẹ́

Wọn ò ráyè orun lójú mọmọ

Bẹ́ẹ̀ni àsùnfalala àsùnjátọ́ lọmọ tálákà ń sùn

Àá ti gbọ́ pé èèyàn lówó tán irú wọn ò tún kófà orun

Ka rójú tán ka tún mọ́ọ wákú kiri

Ká ti rírọ̀rùn tán, ká mọ́ọ wá wàhálà

Nítòótọ́ ni mo gbọ́ pé olúṣekún ìná kìí tánwó

Owó táa ṣiṣẹ́ fún ní lọ́ra lọ́wọ́ ẹni

Ẹ̀mí owó ò lè gùn fẹ́ni tó bá ń sùn sílẹ̀

Ṣugbọn béyàn bá lówó ó yẹ kó tún lè nísinmi

Èwo ni ká wówówówó ká wá dẹrú owó

Kọ́mọ ẹ̀dá ó ma rọ́jú kẹ̀wù ìdàmú bọra rẹ̀ lọ́rùn

Ká sáré lọ ní kùtùkùtù ìdájí ká wọlé lọ́gànjọ́ lóru

Kójú ó tó mọ́ ká ti tún lọ

Ká máa ṣe kìtàkìtà ní gbogbo àkókò

Ẹ bá mi wí fólówó

Kí wọn ó yé tọwọ́ bọ ikú lójú

Kí ọmọ èyàn ó sinmi díẹ̀ kí ó ṣiṣẹ́ díẹ̀ ló tọ̀nà

Ẹ bá mi sọ fún ọlọ́rọ̀ kó fúnra rẹ̀ láàyè ìsinmi

Kó le hu irun funfun lórí kó tó lọ sálákeji

Èyàn tí ò bá sinmi ní kú láyì tásìkò

Ìhòhò pátá la kúkú rìn wáyé, ọwọ́ lọmọ ẹ̀dá ń sán r’ọ̀run

Kóní kálùlù ó yé pára rẹ̀ láyà

Share this poem