البالونة
فيه حاجات لازم علشان نعرف درجة قوتها بنكسرها
وحاجات لازم علشان نعرف إننا عايزينها بنخسرها
كدّبت في عمرك كام صاحب علشان كان نفسك تطّمن...وخسرت صحابك واطّمنت
طب كام بالون فرقعوا منك وانت بتنفخهم عالآخر ....وعرفت آخرهم بس ندمت
دلوقت فهمت أنا عايز إيه .... وأنا كنت بافرقع بلالين ليه
أنا عاوز حاجة بدون آخر... أو حتى بآخر ماوصلّوش
كام حيطة في ضهري أضرب واهري في بدنهم بس ما يتهدّوش... شيء مش مغشوش
مضمون دايمًا ... من غير ماحتاج إني أتأكد أو حتى أخاف إني أتنكد لا يكون في الآخر برضه فشوش
يابشر عارفاني وعارفة أنا مين ... بلغوا أسفي لكل البلالين
كلنا كنا في يوم بالونة وفقعتنا تجارب بني آدمين
بلالين عايشين نفسها تلقى حد يصدق ويقدرها... ويتأكد من إنه عاوزها
من غير مايجرب يخسرها