Cishaduu Ilaahay

Cirka taagay udubli’i

Ciiddana ka dhigey gogol

 

Webiyadaa cartama iyo

Cidhifyada bad kaga xidhey

Iyo buurahaa culus

 

Cimrigeed adduunyada

Waxaa jira col iyo nabade

Caydh iyo nin xoolo leh

 

Iyo laba is-caashaqay

Caawana kama ay tegin

Caynkaynnu ku ogeyn

 

Adna calafka kuu qoran

Cunaa seegi maayee,

Caashaqa ha baayicin!

_____________________________________

 

Caddadkuu Ilaahay

Carradeenna joojee

Aadan ciidda ka alkumay

 

Xaawana cadkiisiyo

Feedh-calaanta laga dhigey

Cishadaa ma uunneyd?

 

Caawana ma nooshahay?

Caqlaa diidey hadalkoo

Carrabdalab la sheegee

 

Ceeryaamo iyo boodh

Ciiro haysku qarinnine

Noloshayda caydh iyo

 

Cilmi guur aan ku fadhiyin

Ku carcaarin maayee,

Caashaqa iska illow!

 

Xalaytaba caweyskii

Canabey daruuruhu

Cimidh bay ahaayeen.

Caawana laguma oga

Waqtigii ku ciiliyo

Cisigiyo wanaagguna.

Ways daba carraabaan

Waxaana kuu caddeyn kara

Caamiyaha indhahali’iyo.

Ma ogtahay curyaankaba

Cago looma waayine

Caynkaa wax loo yidhi.

Kuwa cararayee ladan

Inay ku cibraqaataan

Caashaqa ha baayicin!

_____________________________________

 

Badda caarid maalmo ah

Cawaddaranta fiidkiyo

Caddadaa walaalo ah.

 

Cadceeddii timaaddana

Dadka ruux caddibanoo

Waayuhu ku ciiriyo.

 

Mid caruus ah ayaa jiroo

Caad igama saarree

Cilmiyadaa Ilaahay.

 

Anigoo an caasiyin

Cabsi haygu gelinnine

Adigoo aan cuud dhaqan.

 

Caashaqaan ku taabtaan

Cudurdaar u yeelee

Ceeb kale miyaan dhimay?