Qabri lagugu tuuryaye jinkaad, qolo wadaagtaane

Qalad la igu siray oo ibleys, ii qarshaad tahaye

Qalab uu isagu keensaday oo, qaybsho yaad tahaye

Qabbaankiisa weyn iyo sarkaal, uu qortaad tahaye

Qudurrada sabaankiyo ibtilo, qooqan baad tahaye

Maan-qalato yaad tahay ka timid, qaarad naga dheere.

 

Qofkoo hebed ah yaad kala baxdaa, dhiig adaan qubine

Qobka madaxa saabaan qabow, yaad ku qodataaye

Dadku yaanay qoonsane sarmada, wow qunyareeysaaye

Qabatooyinkaagiyo xadhkaha, kama qaloodaane

Iyagaaba qoolkaad ku ridi, soo qalqaashada'e

Qariib baad ahayd shalay ku dagay, qoobad iyo laabe.

 

Imminkana qor saayid ah adaa, qaytay gurigiiye

Dadkaygii qaraabiyo xigtaba, wuu ku qaayibaye

Iga qaadday qoyskii dhammaa, aan la soo qaxaye,

Qisadaada waan yaabay siday, ugu qushuucaane.

 

Qacda iyo baftiyo weerarkiyo, qoomamka is-laayay

Baaruudda qaraxeeda iyo, qayladiyo wiida

Qaryadaha gubtee ololo iyo, qiiqa kor u duulay

Qalfoofkiyo alaabada qalliban, daaradaha qaawan

Qasnadaha la boobiyo haddeer, qaniga caydhoobay

Qandiyada la saariyo fardaha, qoobka roganaaya

Siigada u sii qayan cirkiyo, qawdhankiyo heesta,

Qisadaada waan yaabay siday, ugu qushuucaane.

 

Qorrax soo baxaysiyo dhulkoo, qurux leh oo doog ah

Webiyada qulqulayee ku dara, qooriyada xeebta

Kaymaha qummaati u baxee, qawlku ruxanaayo

Ubaxyada qadhqadhayee ku yaal, qadowga baashiisa

Ugaadh qaarba dhan u jeeda oo, kala qammaadaysa

Qamar iibinaysiyo dukaan, qaali lagu teedshey

Adduun qaayihiisiyo jacayl, laysu qiranaayo

Marka aad qiyaas ugu shushubi, qooshka malabaysan

Quraac iyo ayaamaha Jimcaha, qado ma doonaane,

Qisadaada waan yaabay siday, ugu qushuucaane.

 

Aniguna haddaan qawl hollado, waa qar soo dumaye

Oday qaxar ah baad iga dhigtiyo, jaahil qaraweyne,

Heshiis igu qasab ah keenso oo, qodobbo ii yeedhi!

 

Laas-caanood, 10.01.2005

 

Wuxuu arkay qooyskiisii oo ku ururay, daawashada TV-ga, oo qof waliba musalsal yeeshey, iyadoo sidaas waajibaad badani ku dayacmeen, wuxuuna yidhi isagoo la hadlaya shaashadda: