Lá lu'
Ridxí ne huaxhinni, lá lu'.
Siadó', huadxí, lu gueela',
nisi lá lu' riree xieque
ndaani' bichuga íque'
sica tuuxa zeguyoo
runi biniti guendabiaani',
nisi lá lu' riree chuuchi
lu ludxe'
sica benda ndaani' ná'
ti guuze'.
Guindisa' ti gui'chi', lá lu'.
Cuaque' ti xiixa, lá lu'.
Gabati' nalu' nuaa'
cadi daabi guichi lá lu'
íque bicuini naya'
ne ratiicasi zedide'
málasi gó la'na'
guendarietenala'dxi' lú lu'
ñee xquendanabane'.
Ma yanna nga nabaana
ne huidxe mápeca saa guidxi.
Zándaca ridxí zaxhaca la'dxi'
sá' nanda huaxhinni.
Zándaca naa guibane' ti dxi
ne guirá' ca yaya xtí' xquendagute',
zapa ruá' ti nisadó' guendaricaala'dxi'
ndaani' ladxiduá' guzeete' lá lu',
zápa' rua' neca xtuudxi huiini' bi
guzayaniá' ti dxumisú birixhiaa
gusitenala'dxi' lii guendaranaxhii stinne'
sica rusietenala'dxi' laanu ne xquendayaya
dxi ma zeedadxiña xhí nisaguié.